اسامة بيكلو فى اخر حوار : انا زي (ابيي) متنازع علي بين الفنانين

بصمت محزن، رحل عن دنيانا امس الاول الموسيقار اسامة بابكر (بيكلو)، والذي شكل حالة فريدة من الحالات الابداعية السودانية الخالصة، رحل (بيكلو) بعد ان شغل الناس وخطف الاضواء وداوى جروح العاشقين بإحساسه المدهش وعبقريته الخالصة، (الكرامة) عبر المساحة التالية تنشر آخر حوار مع الراحل بيكلو …

حوار: أحمد دندش

*انت متهم بالنرجسية المفرطة وسط افراد الفرق الموسيقية التي تعمل معها…؟ حتى اجرك مختلف عن باقي اجور زملائك..؟
اولا نرجسية دي كلمة (كتيرة علي)، انا زول بسيط وبقبل البسيط، واي زول يقول ليك كلام غير دا معناها مابعرفني ولااتعامل معاي.

*التوتر والخوف، صفات ملازمة لك حتى وانت على المسرح، ماتعليقك..؟
شوف، في وسطنا لازم يكون عندك مناعة ضد التوتر والخوف عشان تبدع، وخليني احكي ليك قصة (مجازا) اني اول مااقتنعت اكون عازف مُستقل في الوسط الفني مشيت الصيدلية وقلت للدكتور اديني حبوب شجاعة قام اداني 30 حبة بحيث ابلع كل يوم حبة لكن انا بلعتهم كلهم عشان انتهي من قصة الخوف والتوتر دي.يضحك.

*هل صحيح انك تتعمد خطف الاضواء من الفنانين وزملاءك في الفرقة الموسيقية.؟
دا كلام غير صحيح، وحتى ان تردد فهذا انتصار يحسب للعبد لله في المقام الاول، بعدين في معلومة مهمة لازم تعرفها وانو الالة الانا بعزفها دي اله استثنائية واله صعبة جدا وفي تصنيفها تقوم بادوار ثانوية ضمن العمل الموسيقى.

*بيكلو بين الفنانين الكبار والشباب.؟
شوف انا زي منطقة (ابيي) متنازع عليهو مابين الفنانين الكبار والشباب والحمد لله يضحك.

*بصراحة هل هناك مؤامرات وضرب تحت الحزام داخل الفرق الموسيقية.؟
انا بعزف آلة البيكلو دي لي 45 سنة، يعني لو بنفخ في بالونة غالبا حتكون وصلت من الخرطوم للدمازين، وانا عضو في اتحاد الفنانين منذ العام 1979 مالاقيت ولاشفت اي مؤامرات او حروب او دسائس، بالعكس اجد كل الحب والتعاون من الفنانين والاخوة العازفين.

*هل هناك اختلاف بين اسامة بابكر واسامة بيكلو.؟
طبعاً اسامة بابكر منفصل تماما عن اسامة بيكلو، اسامة بابكر ممكن يكون حاد او ناشف شوية في التعامل بعكس اسامة بيكلو المرهف والحساس…دي حقيقة.
*هناك علاقة حب تجمعك بهذه الالة الصغيرة…لاي مدى يمكن ان يصل حبك لها..؟
للمدى البخليني اول مااقوم من النوم اشيلها واقول ليها صباح الخير حتى قبل مااقول صباح الخير للمدام واولادي سامر وسماح ووائل.

*ماسر الخلاف الشهير مابينك والموسيقار محمد الامين والذي بموجبه تركت العمل في فرقته الموسيقية.؟
اولا الاستاذ انا (مابسوى ضفر من موسيقاه)، وماحدث من تضخيم للمشكلة كان غير صحيح، وحاليا انا عدت للعمل في فرقته الموسيقية وبيننا كل الحب والاحترام.

*موقف صعب لن تنساه مع الآلة.؟
زمان انا كنت البدفع منصرفات البيت من اله البيكلو دي ومن شغلي، وللعلم الالة دي اشبه بالساعة حساسة جدا جدا، يعني لو جات عليها زرة تراب ممكن تعطلها، وزمان ماكانت حتى عندي اله حديثة زي البعزف عليها مؤخراً، كانت عندي اله قديمة شوية شلتها من منزل استاذنا موسى محمد ابراهيم وكنت شغال بيها الحفلات، وبتذكر لما الاله دي كانت تعطل انا كنت بقوم من عشرة صباحا اصلحها، فالوالدة كانت بتجي وتسالني كل شوية (اها يااسامة اتصلحت) وطبعا هي عايزة تطمن انها اتصلحت عشان المصاريف وكدا، فلما اقول ليها اتصلحت كانت بتديني زغرودة صغيرة كدا بمثابة احتفال.

*علمنا مؤخراً انك شرعت في تحقيق حلمك الكبير حدثنا عنه.؟
انا منذ العام 2016 اثرت على نفسي تكوين اوركسترا باسم الوطن، وبالفعل سعيت وجمعت 80 عازفا من خيره العازفين لهذا الغرض لكن اتصدمنا بالامكانيات حتى الدولة ماساهمت معانا في المشروع الكبير دا وحاليا الحلم متوقف لحين ظهور اي بادرة امل جديدة للاستمرارية.

*العازفين…مظلومين من الفنانين.؟
نعم…ظلم كبير جدا، وهو امر مؤسف، وانا بكل صدق تستحضرني قصة مؤلمة لعازف كبير استوقفني ذات يوم وطلب مني مبلغ 5 جنيهات ليشترى بندول، وان يصل الحال بالعازفين الى هذا الحد فلا اعتقد ان هناك ظلم اكبر واقسى من ذلك، لذا يجب ان يكون للعازف معاش على الاقل حتى يجد مايسنده وقت الحاجة.