حديث مالك عقار في محور سنار.. !

# في احدى زياراته المتفقدة للابطال في محور سنار.. كان السيد مالك عقار اير.. نائب رئيس مجلس السيادة، يعبر عن 40 مليون سوداني فضلوا الركون الى فضيلة الصمت وامتنعوا عن الحديث تأدباً في حضرة المؤسسة العريقة، فلم يشيروا لذلك الابطاء المتعلق بالعمليات، قالها الرجل الذي بدا عليه الضيق في الهواء الطليق فكان حديثه اقل حدة من ذلك (الفارغ) الذي يسمعونه في الغرف المغلقة من القائد العام ونائبه ومساعديه.. هذا الابطاء هو الذي اغرى هؤلاء الاوباش باستباحة كل شيء يجدونه امامهم.. ان من يعتقد ان الاخ (بسيوني كامل) قد اعلن غضبته تلك على قائد متحرك سنار من تلقاء نفسه.. واهم.. لان خطوط القادة الكبار مفتوحة بحري وقبلي مع الاعلام الذي يعبر احيانا كثيرة عن ما لا يستطيعون قوله صراحة.. فشكل ذلك الهجوم (خجة) موجبة لسعادتو ربيع وسوف تتلاحق بعدها الانتصارات في جميع مسارح العمليات النشطة.
# يومها.. قالها السيد عقار لمتحرك سنار بلسان بيّن وفصيح.. وباللغة التي يفهمها (ناس الجيش).. رافضا الشكوى ورهن التحرك الى الامام بالمطالب.. حيث اوجز: (خير وسيلة للدفاع هو الهجوم، الناس بتتكلم كتير إنو المناطق دي مناطق كاشفة، القيادات لازم تبتدع وسيلة وطريقة تناسب طبيعة الأرض وجغرافيا العسكرية الموجودة في الأرض، القيادات العندكم هنا ديل ناس اتعلموا قروا في المعاهد عسكرية وعندهم تجارب، هذه المنقطة تحتاج لوثبات قتالية متقدمة وخنادق متحركة، دي طبيعة الأرض بتتحكم إنو يكون في خنادق، شنو المقصود بالتقدم الاحترافي، انت تتحرك مع الخندق، ممكن تقول لي الخندق ده مع الواطة، لا هو بتحرك، يعني لما تتحرك 10 متر تحفر دفاع، دفاع يكون قوي، دفاع يكون متحكم في الخطط والقراءة بتاعته، ودي حصلت في كتير من الحروب في أمريكا مثلاً، وحصلت في فيتنام، الفيتناميين هزموا الأمريكان بالخنادق المتحركة، أنا شخصيا عندي تجربة كتير في منطقة زي منطقة التربيزة دي منطقة كاشفة، كل 10 متر بنحفر خنادق، لكن انت تمشي في المحلات الهم قاعدين فيها وتضربوهم وتجو راجعين محلاتكم، ما هم بنتهجوا الأسلوب نفسه، وبكونوا نفسهم وبجوكم في سنار، يجوكم في سنار يا سعادتك، حتى يمشوا سنجة، التقدم ده إن شاء الله كل يوم، إذا ما كل يوم بتتقدموا كيلو، الناس ديل يوم بجوكم هنا في المحل ده، إذا انتو منتظرين إنو يجيكم الإعداد ما في إعداد كامل في أفريقيا وفي العالم ما سمعنا بإعداد كامل، داير أقول أنا بعرف الحرب وأنا بعرف التكتيكات العسكرية، أنا برضو مشيت في كليات رايقة جداً جداً، لكن ما في إعداد كامل إعداد كامل لقوات متقدمة ده ما موجود، زمان كان موجود، ولا ح تكون في كسلا ولا سنار ولا القضارف، فالناس تتحرك بما عندهم، في قاعدة عسكرية بتقول أعمل بما لديك عشان تكسب ما لم يكن لديك، دي قاعدة ثابتة، إذا الزول ده عندو مدافع وانت ما عندك مدافع، استعمل الأرض، الأرض دي سلاح قائم بذاته الأرض دي سلاح كبير، الأرض دي فيها ميزتين مهمتين الأرض دي مسجد والأرض دي سلاح، الاتنين ممكن تستعملهم، وما في سبب إنو الناس يقعدوا في سبات، أنا بقول إنو لابد يكون في انطلاق إلى الأمام، إذا منتظرين الإعداد الكامل للقوة دي، بالطريقة المطلوبة بالطريقة الانتو ختيتوها في الورقة الأنا ما شفتها، لكن إذا منتظرين الإعداد الكامل لهذه القوة ح تنتظروا لسنين عددا، والعدو ح يجيكم في المحل ده، أحسن تستعد بالعمل العندنا بالعمل والإصرار، لالا ما جاهزين بالخشم انت ما بتقول جاهز بالكلام، الجاهزية دي بقولوها هنا مش هناك، والحماس ذاتو أنا بعرفوا قبل كده، فأنا داير أقول إنو لابد يكون في تقدم للأمام، نحنا في المجلس السيادي بنقل ليكم تحيات رئيس المجلس السيادي، وأعضاء المجلس السيادي، بنعمل ما في وسعنا عشان نقدر نوفر كل المعينات، السودان في حرب والاقتصاد الموجود الفي السودان ده اقتصاد حرب، واقتصاد الحرب فيهو أولويات الأولويات بتاعتو هي الحرب ذاتها، زايد الأولويات بتجيب سلاح وذخيرة ومواد القوات المسلحة، السيد الوالي أنا متأكد إذا قعدت معاهو بعد شوية ح يقول لي منقوصين في المواد لكن نحنا بنقول المواد تمشي للزول البمشي ل قدام عشان يكون عندو القدرة يمشي مرتاح).
# نحن من هنا نحيي اللواء الركن دكتور ربيع عبد الله قائد المتحرك ونقول له (اسمع كلام الببكيك) لانك فينا مرجوا.. والتحية ودقع الكعوب للواء سراج قائد الفرقة 17 والعميد علي بيلو قائد اللواء 265 داجو.. وابطال القوات المسلحة وجهاز المخابرات والمستنفرين وقوات النيل الازرق.. لانهم اظهروا بسالة كبيرة في صد العدوان على جبل موية ومحور سنار.. ونجحوا سريعا في اسكات المدفع 120 الذي قام بالتدوين في تخوم المدينة وتدميره تماما.. لابد من استغلال ما حدث بالامس من اجل التقدم وكسب مساحات واسعة نحو تحرير قرى غرب سنار ومحلية جنوب الجزيرة.. ذلك ليس صعبا على القوات الباسلة التي لمسنا شجاعتها النادرة في جبل موية وفنقوقة والبليحاب.. حديث القادة يا سعادتو ربيع هو الحديث (الببكي).. لا تلك الابواق التي لا تعرف (كوعها من بوعها) في الحياة وتبذل لكم التطبيل الفطير.