مسرح الحرب و….(الذكريات).!

(١)
المكان: تقاطع شارع الشرقي مع عبيد ختم.
الزمان: قبل الحرب بشهر واحد فقط.

(يااخوانا باركوها)…
والاشتباك يكاد يصل ذروته بين سائق الركشة (العاكس الشارع) وسيد الكريسيدا (السمحة وسمح سيدها)…
وتأتي تلك العبارة لتخمد كل شئ…
يغادر سائق الكريسيدا بعد ان (عفا واصلح)…
ويعود سائق الركشة ليرفع مستوى صوت السماعات ويضخ في الشارع ذات اليمين وذات الشمال اغنية الحوت (ولاتسأل هي راحت وين)..!

(٢)
ووجع الذكريات يتمدد…
ماقبل الحرب كان كل السودانيين ناقمين ومعترضين ومتحسرين على الاوضاع في البلد….
(جالون البنزين عمل كم)..؟
(ياخي دي بلد دي)…؟
(والله الواحد لو كانت جنسيتو ….. ماكان احسن ليهو)..؟
وبعد الحرب…
صار كل السودانيين يبحثون عن ذات (الوطن)…
يريدون استعادته بأي ثمن…
بازماته…
بنكباته…
بسخونة اجواءه…وازدحام طرقاته…
يريدون استعادته بأي ثمن…واي صورة…
وتلك قيمة الاوطان…
لاندركها حتى نفقدها…

(٣)
صديقي صاحب الشارب الكثيف والقميص (الكاروهات) كان من اكثر الناقمين على البلد…
يحيل جلساتنا كلها بلا استثناء لفاصل من (المناحات)…
يشكو …..ويشكو…..
حتى تفقد قهوة الحاجة (ام الناس) التي كنا نحتسيها بالفلل الرئاسية بشارع النيل (طعم السكر)…
فننادى: (ياام الناس بالله سكر ياخ)…
فيصطادنا وقتها بكل قسوة…
(ياخ ماتخلو عندكم احساس انتو عارفين رطل السكر بقى بي كم)..؟
ويواصل تفريغ حمولته الثقيلة من (الشكيه)…
قبل ايام صادفته باحد شوارع القاهرة…
جسمه انتحل…وشاربه الكثيف اصبح (اخف) من المعتاد…
كان يرتدي جلبابا واسعا…
سألته: (يازول وين القمصان والوجاهات)…
نظر الي نظرة كسيحة الزوايا…
ورد باقتضاب: (اتشفشفوا).!
صمتّ…بعد ان ادركت انه سيبدأ فاصله المعتاد من (الشكيه)…
لكنه باغتني قائلا بعد ان وضع يده على رأسه: (عليك الله بتتذكر زمان لما كنا بنمشي نشرب القهوة عند ام الناس في الفلل)…
لم اجبه…
وهو لم ينتظر مقاطعتي وواصل: (ياخ ربنا يرجع لينا الايام ديك).
فجأة اطلق ضحكة قصيرة مسترسلاً: (تتذكر لما بتاع التبش ادانا ليهو من غير شطة).!
اطلقت انا ضحكة قصيرة…واردت ان اجيبه واستدعي معه الذكريات…
لكنه غادر…
بصعوبة لحقت به…
امسكته من كتفه وسألته: (يازول مالك).؟
اجابني وهو يحاول اخفاء دمعة تسللت في عناد: (مشيت لاني خجلان وتعبان)…
قلت له وانا اشد من يده: (ياحبيب بكرة بنرجع).!
اجابني وهو يواصل مغادرته: (ياريت نرجع…واوعدك تاني عمري مااشكي ليكم من حاجة)…!

(٤)
المكان: السوق العربي
الزمان: الساعة الثانية ظهراً قبل الحرب بشهرين

(ليمون واحد جنيه…عرديب واحد جنيه…والطعمية جامبو).!
يتسلل صوت العم (عرفان) صاحب اشهر ترويج للعصائر والمأكولات بالسوق العربي…
واكتظاظ السوق يجعل من (المساسقة) بالاقدام امراً حتمياً…
ف تارة تكون المساسقة عبر (برندات عمارة الدهب)…وتارة عبر ممرات (موقف ابو جنزير القديم)…مروراً حتى (برج البركة)…
والمشوار هناك زمنه الافتراضي عشر دقائق…
اما زمنه الفعلي فهو (ثلاث ساعات) بسبب الزحام…
واحدهم في برنامج تلفزيوني يشكو من (الزحام) و(الاوساخ) بوسط السوق ويطلب من الحكومة ضرورة التدخل…
و……..
عزيزي (الممتعض)…
الان المكان خال…
لايوجد زحام…
وبدلاً عن (الاكياس) تتناثر (الجثث)…
و……بلا (اكياس).!

(٥)
صراخ وعويل من منزل جيراننا بالحي في خواتيم العام ٢٠٠٩…
يخرج الجميع من منزلهم…
نتوقف بصمت امام تلك البوابة الخشبية العتيقة…
دقائق ويخرج (ف)…
يخبرنا باقتضاب بان والدته قد توفيت…
يرفع الجميع الاكف بالفاتحة قبل ان يتوجه الجميع للمقابر…
يصل الجثمان ويهم الشباب بانزاله ل(ود اللحد)…
يهتف (ف) فجأة بصوت عال: (خلوها تعفي لي قبل تدفنوها)…
يحاول اكثرنا (تديناً وورعاً) ان يهدئ من روعه…
يزيحه (ف) بقسوة وهو يواصل رجاءاته…
يمسكه اثنان من اصدقاءه وينتحيان به جانباً…
تسللت خلفهم…فقد كنت في شغف حزين لمعرفة مايدور…
قال له الاول بلطف: (ادعوا ليها بالرحمة وربنا يصبرك).!
هنا صرخ…
(يااخوانا انا دايرها بس تعفي لي…عليكم الله خلوها تعفي لي).!
اجابه الآخر: (هي بين يدي الله الان).!
هنا صمت (ف)…
ثم جلس على الارض وهو يردد: (وطيب انا الاقيها كيف تاني عشان اطلب عفوها).!
ونحن الان جميعاً نقف ذلك الموقف…
بإختلاف الشخوص…والحدث…وبأتفاق الرسالة والمضمون…
نحن جميعاً اليوم نقف لنطلب العفو من (الوطن)…
وربما سنكون افضل حظاً من (ف)…
فسيعود لنا الوطن و…(ان طال الزمن)…
اما هو فمن يعيد له والدته.؟

(٧)
صخب المسرح القومي وحفلات الراحل ود الامين…
(معديه) توتي واغنيات حمد الريح…
شارع النيل وكوبري شمبات و(فتة الحرامي)…
شارع الستين ومحطة الدومة واتحاد الفنانين و (وود البنا جمال ومحنة)…
(كوارع الموناليزا) وشاي اميرة و(صينية بطة) المكتظة بكل الاصناف…
القصر الجمهوري ومبادلتنا التحايا مع الحرس ب(الدبشك)…
ميدان عقرب… والمزاد شارع (بيت محمود عبد العزيز)…
الكلاكلات ورحلات الري المصري و(غنجات) الغابة…
امبدات والثورات و(سوق ليبيا)…
خماسيات استاد التحرير و(هيثم ضربه) اللعاب…
الفردوس وبيت ناس محمد خليل والعشاء في (الشايقي) والكوشتينة في (نادي الاراك)…و….

ساعتين بالعدد مفروض تبتسم…
لانك حتكون (جوه مدني)…

الكاسح والزمالك وبيت ناس شهاب عباس…انور حلجا وجلسات الغناء و(الونس اللطيف)…
جزيرة الفيل…ومشاوير العصارى و(بيت الضيافة)…
آدم شيه و(الصحانه تتطاقش)…والسوق الكبير…بيت الكاشف…وشجرة المنقه…والضريح…و….
و….
(اصحى يازول الناس ماتت في ود النورة)…!!